Tapica e Bayeux mbërrin në British Museum pas transferimi sekret nga Franca

Tapica e Bayeux ka mbërritur në Mbretërinë e Bashkuar për herë të parë që prej afërsisht 1,000 vjetësh, dhe pritet të ekspozohet në British Museum në muajin shtator. Një kuti e rëndë e vendosur në një kornizë alumini u shkarkua nga një kamion në një zonë ngarkimi, para një grupi të zgjedhur të të pranishmëve, që përfshinte edhe ambasadorin francez dhe drejtuesin e muzeut.

Raporton bbc.co se transporti u realizua në orën 02:50, nga një vend i fshehtë në veri të Francës, nën përcjellje të një roje policore, dhe se tapicia mbërriti e paketuar për të garantuar ruajtjen e saj. Ekspozita në Londër do të zgjasë nëntë muaj, ndërsa muzeu në Bayeux, ku tapicia ka qenë e ekspozuar që nga viti 1983, është i mbyllur për rinovim.

Tapicia, një qëndisje e shekullit XI gjatë 70 metrash me 58 skena, tregon ngjarjet që i paraprinë Pushtimit Norman të Anglisë në vitin 1066. Drejtuesit e British Museum përshkruan ardhjen e saj si një moment të jashtëzakonshëm dhe theksuan pritshmërinë për ta ndarë me publikun. Kuratorja e projektit tha se emocionet ishin të forta për shkak të afërsisë kronologjike mes ngjarjeve të përshkruara dhe kohës kur është punuar tapicia.

Presidenti francez Emmanuel Macron publikoi më parë një imazh të tapicisë të projeksionuar mbi shkëmbinjtë e Doverit me mbishkrimin “merci beaucoup”. Marrëveshja për huazimin nëntëmujor u mbështet nga qeveria franceze dhe u finalizua mes Macron dhe kryeministrit britanik Sir Keir Starmer. Në shkëmbim, British Museum do të huazojë disa objekte nga koleksionet e tij, përfshirë pjesë nga thesarit të Sutton Hoo dhe figurat e shahut të Lewis, të bëra nga elefanti i detit në shekullin XII.

Në Francë, njoftimi shkaktoi shqetësime dhe një peticion që e quajti huazimin një “krim të trashëgimisë”; gjithashtu artistë dhe figura publike shprehën frikën se lëvizja mund të rrezikonte një objekt kaq të brishtë. Interesi i publikut në Britani ka qenë i madh, me mijëra që u përpoqën të sigurojnë bileta, dhe të gjitha masat e sigurisë u morën për të minimizuar çdo rrezik gjatë transportit, sipas bbc.co.