TEHERAN – Irani u bën thirrje vendeve të tjera të mos i bashkohen sanksioneve të reja amerikane

– Irani i ka cilësuar si “terrorizëm shtetëror” sanksionet e reja ekonomike të vendosura nga SHBA-ja dhe u ka bërë thirrje vendeve të tjera të mos i zbatojnë ato, raportoi “Reuters”.

Ministria e Jashtme iraniane deklaroi se, sipas së drejtës ndërkombëtare, shtetet e tjera nuk duhet të zbatojnë sanksionet amerikane ndaj Teheranit.

Sipas Iranit, masat e reja rrezikojnë jetën dhe mirëqenien e miliona civilëve.

Ndërkohë, SHBA-ja po shton presionin ekonomik ndaj Iranit.

Administrata e presidentit Donald Trump ka paralajmëruar vendet që vazhdojnë marrëdhëniet tregtare me Teheranin se mund të përballen me sanksione dytësore.

Një zyrtar amerikan tha se Uashingtoni planifikon gjithashtu të kufizojë aksesin e Banque Misr të Egjiptit në sistemin financiar amerikan, për shkak të aktivitetit të saj me Iranin.

Thesari amerikan njoftoi edhe sanksione ndaj një kompanie në Hong Kong dhe një personi të lidhur me Bank Melli të Iranit.

Përpjekje për rihapjen e Ngushticës së Hormuzit

Në të njëjtën kohë, Katari dhe Pakistani po përpiqen të rikthejnë negociatat për përfundimin e luftës dhe rihapjen e plotë të Ngushticës së Hormuzit, një nga pengesat kryesore për një marrëveshje paqeje.

Ministri i Jashtëm iranian, Abbas Araqchi, tha se presioni amerikan nuk funksionon dhe bëri thirrje për rikthimin e diplomacisë dhe negociatave.

Ngushtica e Hormuzit është një pikë kyçe për tregtinë botërore të naftës.

Irani ka kërcënuar se do të godasë anijet që kalojnë nëpër të pa autorizim, ndërsa SHBA-ja këmbëngul që ajo të mbetet një rrugë ujore ndërkombëtare e hapur.

SHBA-ja njoftoi se ka pastruar minat detare në disa zona të ngushticës, por trafiku detar mbetet shumë më i ulët se normalisht.

Dje kaluan vetëm shtatë anije transporti mallrash, nga 17 një ditë më parë dhe një mesatare prej 15 anijesh në 10 ditët e fundit.

Megjithatë, çmimet e naftës regjistruan sot një rënie, ndërsa tregu dha sinjale se flukset e naftës përmes Hormuzit po rriteshin gradualisht. /