TEL AVIV – Netanyahu: Izraeli paralajmëroi BM-në për sulmin e dyshuar pranë bazës “RAF Fairford”

– Kryeministri izraelit Benjamin Netanyahu deklaroi sot se Izraeli i kishte dhënë Britanisë së Madhe, informacion nga shërbimet e inteligjencës për një sulm të dyshuar, të mbështetur nga Irani pranë bazës ushtarake “RAF Fairford”, përpara se Londra të vendoste masa kufizuese tregtare ndaj vendbanimeve izraelite në Bregun Perëndimor.

Në një intervistë për televizionin amerikan “Fox News”, Netanyahu kritikoi qeverinë britanike për vendosjen e masave tregtare ndaj Izraelit, duke theksuar se, sipas tij, kjo ndodhi menjëherë pasi Izraeli kishte ndarë me autoritetet britanike informacion mbi një sulm të dyshuar të mbështetur nga Irani.

Britania e Madhe njoftoi ndalimin e tregtisë me disa vendbanime izraelite në Bregun Perëndimor të pushtuar, në përgjigje të zgjerimit të këtyre vendbanimeve.

Ky vendim shkaktoi një përplasje diplomatike mes qeverive britanike dhe izraelite.

Incidenti pranë “RAF Fairford” ndodhi gjatë fundjavës.

Pesë shtetas britanikë rreth të 20-ave u arrestuan pranë bazës, nën dyshimin për vepra që lidhen me terrorizmin dhe më pas u liruan me kusht, ndërsa hetimi vazhdon.

Policia tha se në automjetet e tyre u gjet një sasi benzine, por nuk u gjetën eksplozivë.

Kryeministri britanik, Andy Burnham deklaroi se ka “tregues të fortë” se Irani ka pasur rol në incident, por theksoi se hetimi policor është ende në zhvillim.

Irani ka mohuar çdo përfshirje. /