Thaçi: Dialogu në Bruksel përmbyllet me njohjen e Kosovës nga Serbia

Kryeministri në detyrë, Hashim Thaçi, ka shprehur besimin se në fund të procesit negociator në Bruksel me Serbinë do të vijë deri të njohja e plotë e realitetit, përfshirë edhe njohjen e pavarësisë së Kosovës.

“Në fund të tërë procesit do të kemi pranim të plotë të realitetit, përfshirë edhe pavarësinë e Kosovës, si pjesë e pandashme e arkitekturës së Ballkanit. Nuk kam asnjë dyshim se po shkojmë në atë drejtim”, ka thënë Thaçi në një intervistë për të përditshmen serbe, “Danas”.

Thaçi ka thënë se partia e tij, si fituese e qartë e zgjedhjeve, pret që ta udhëheq Qeverinë edhe në katër vitet e ardhshme. Por, thotë se aktualisht çështja e mandatarit është para Gjykatës Kushtetuese dhe se ai do ta respektojë çfarëdo vendimi që sjellë kjo gjykatë.

“Cilido që të jetë formati i Qeverisë, dialogu me fqinjët është kushti kryesor për integrimet evropiane. Kosova ka arritur që ta vendos kufirin e qartë me Serbinë dhe nuk ka asnjë dyshim që Serbia është dashur ta pranojë rendin juridik dhe kushtetues të Kosovës, si i vetmi ligjbërës në veri të Kosovës. Kjo është rrugë në një drejtim, që do ta vazhdojë si bazë për vendosjen e marrëdhënieve normale në Ballkan”, ka thënë ai.

Kryeministri Thaçi ka potencuar se serbët, si pakicë, i kanë vendet e rezervuara sipas Kushtetutës në Qeverinë e Kosovës.

Ndërsa duke folur për sigurinë e qytetarëve serbë në Kosovë, Thaçi ka thënë se “Bashkësia serbe është e sigurt në Kosovën e pavarur. Sipas statistoave, më e sigurt është të lëvizësh nëpër Prishtinë sesa në Beograd”, ka thënë Thaçi, duke potencuar se duhet të përkujdesen që të zbatohen marrëveshjet e dialogut, në mënyrë që situata të normalizohet.