Tonali flet si lojtar i Tottenham: Nëse një ditë krijohet mundësia, do të rikthehem te Milani…

Sandro Tonali rikthehet në Angli pas një tjetër transferimi të madh. Mesfushori italian, ish-lojtar i Milanit, largohet nga Newcastle për t’iu bashkuar Tottenhamit për 100 milionë paund (rreth 116 milionë euro).

I ndaluar nga gazetarët në aeroportin e Milanos, “Malpensa”, para nisjes, Tonali nuk e fshehu entuziazmin për aventurën e re në Londër: “Jam shumë i lumtur. Vendosëm të ndryshonim dhe jemi gati për këtë aventurë të re”.

Edhe pse kanë kaluar tri vite prej largimit nga Milani, kuqezinjtë mbeten ende në zemrën e tij. Për një rikthim të mundshëm, ai u shpreh: “Me shaka flasim gjithmonë për këtë, sa herë që takohemi. Besoj se nëse një ditë do të jetë mundësia, do ta diskutojmë seriozisht”.

Tonali theksoi se deri më tani nuk ka pasur mundësi reale për t’u rikthyer në Itali: “Deri sot ka qenë gjithmonë shumë e vështirë. Kështu që them se nuk ka pasur kurrë një mundësi të vërtetë për t’u kthyer”.

Në fund, ai foli edhe për Paolo Maldinin si drejtor teknik i kombëtares axurre: “Do të më pëlqente shumë. Ende nuk kemi folur, por sigurisht do të ishte emocionuese të punonim sërish bashkë”.