Trump fajëson Iranin për sulmin ndaj tubacionit strategjik saudit: “Ka shumë mundësi që janë ata”

Presidenti i SHBA-së, Donald Trump, tha të shtunën se Irani ishte “me shumë mundësi” autori i sulmit ndaj një tubacioni jetik naftës në Arabinë Saudite, që çoi në mbylljen e tij. I pyetur nga gazetarët gjatë vizitës në Dublin, Trump iu përgjigj: “Mendoj se janë ata, me shumë mundësi janë ata.”

Tubacioni East-West u sulmua të enjten nga disa dronë që erdhën nga Iraku, njoftoi të premten ministria e jashtme saudite, duke shkaktuar plagosje dhe dëmtime. Ministria e energjisë tha se tubacioni “iu nënshtrua sulmeve të shumta” që “shkaktuan një numër të plagosurish” dhe se u mbyll si masë paraprake. Ekipet e specializuara po “marrin masat e nevojshme për ta siguruar tubacionin dhe për të vlerësuar sigurinë e tij”, thuhet në deklaratë.

Sulmi vjen në një moment kritik: tubacioni është bërë jetik për eksportet saudite që nga shpërthimi i luftës SHBA-Iran, pasi Irani efektivisht mbylli Ngushticën e Hormuzit. Mbretëria ka ridrejtuar rreth 5 milionë fuçi naftë në ditë drejt portit Yanbu në Detin e Kuq — një rrugë eksporti që tani ndodhet nën kërcënim në rritje, pas përparimeve të Huthi-t në Jemen.

Trump tha se kishte folur në telefon me princin e kurorës saudite, Mohammed bin Salman, të cilin e quajti “mik të mirë”. Një burim i tha CNN se princi e kishte thirrur Trump-in dy herë të enjten duke i kërkuar të godiste Huthi-t ndërsa ata përparojnë drejt Detit të Kuq, por Trump refuzoi. Nga ana tjetër, Trump shtoi se Huthi-t i kishin thënë administratës së tij se nuk donin që SHBA-të të përfshiheshin drejtpërdrejt në konflikt.

Autori i sulmit mbetet i paqartë. Një grup ombrellë i milicive të mbështetura nga Irani në Irak, i njohur si Rezistenca Islame në Irak, e ka mohuar përgjegjësinë. Qeveria irakiane i dënoi sulmet, urdhëroi hetim urgjent për përgjegjësit dhe të shtunën njoftoi mbylljen e disa kufijve si masë paraprake. “Do të shkojë gjithçka mirë”, tha Trump duke iu përgjigjur shqetësimeve për transportin detar përmes Hormuzit.

Burimi: CNN