TURQI – Rreth 100 turistë evakuohen pas zjarrit në një anije

STAMBOLL, 13 gusht /ATSH-DPA/ – Një varkë turistike u përfshi nga zjarri sot në det, pranë resortit turistik “Fethiye”, në jugperëndim të Turqisë, duke detyruar 115 persona, mes tyre fëmijë dhe anëtarë të ekuipazhit, të hidheshin në det me jelekë shpëtimi.

Sipas AA-së, ekipet e emergjencës arritën të shuajnë zjarrin dhe të gjithë personat në bord u evakuuan me sukses.

Deri tani nuk janë raportuar viktima.

Dy persona që kishin thithur tym u dërguan në spital, ndërsa disa fëmijë iu nënshtruan kontrolleve mjekësore si masë paraprake.

Shkaku i zjarrit ende nuk është përcaktuar.

Sipas agjencisë private ”Demiroren”, flakët nisën rreth orës 11:00, në kuzhinën e anijes, në gjirin Katranci.

Zjarri u përhap me shpejtësi në pjesë të tjera të mjetit, duke shkaktuar panik mes turistëve dhe ekuipazhit.

Pas përhapjes së flakëve, personat në bord u detyruan të largoheshin nga varka dhe të hynin në ujë me jelekë shpëtimi.

Në operacionin e shpëtimit morën pjesë ekipet e rojes bregdetare dhe policisë detare, ndërsa disa varka të tjera që ndodheshin pranë iu bashkuan ndërhyrjes.

Varka u dëmtua rëndë dhe u konsiderua e papërdorshme.

Autoritetet nisën hetimet për të përcaktuar shkakun e zjarrit dhe nëse janë respektuar të gjitha masat e sigurisë.

“Fethiye” është një nga destinacionet më të njohura turistike të Turqisë dhe shëtitjet me varka përgjatë brigjeve të Egjeut dhe Mesdheut janë veçanërisht të preferuara gjatë sezonit veror. /Ad.Ab./ a.jor.