Type One Energy mbledh 200 milionë dollarë me mbështetjen e Siemens Energy për reaktorin e parë komercial të fuzionit

Type One Energy, startup amerikan në fushën e fuzionit bërthamor, ka mbledhur 200 milionë dollarë në një raund financimi të Serisë B, siç njofton Reuters, duke vijuar garën për të ndërtuar reaktorin e parë komercial të fuzionit në botë. Lajmin për agjencinë e konfirmoi drejtuesi i kompanisë, Christofer Mowry, i cili tha se raundi tërhoqi edhe njësinë e investimeve të gjigantit gjerman Siemens Energy (ENR1n.DE).

Raundi është i treti më i madhi i regjistruar në sektorin e fuzionit gjatë pesë viteve të fundit, sipas të dhënave të PitchBook, ndërsa vlerësimi i kompanisë nuk u bë i ditur. Me këtë financim, kapitali total i mbledhur nga Type One deri më tani kalon 400 milionë dollarë.

Kompaninë e mbështesin tashmë Breakthrough Energy Ventures i Bill Gates-it dhe Clutterbuck Capital, ndërsa në mesin e investitorëve të rinj, përkrah Siemens Energy Ventures, renditen edhe Lowercarbon Capital — e bashkëthemeluar nga investitori i hershëm i Uber-it, Chris Sacca — dhe SiteGround Capital. Sipas Reuters, partneri i Siemens Energy Ventures, Enrique Gonzalez Zanetich, tha se marrëveshja e forcon pozicionin e kompanisë në fuzion “ndërsa ne vazhdojmë të eksplorojmë teknologjitë dhe bashkëpunimet që mund të ndihmojnë avancimin e komercializimit”.

Type One po zhvillon një stellarator — një lloj reaktori fuzioni që përdor fusha magnetike komplekse për të përmbajtur plazmën super të nxehtë. Fondet do të shkojnë për prototipin inxhinierik të makinës, të quajtur “Infinity One”, që po ndërtohet në Bull Run të Tenesit në kuadër të “Projektit Infinity”, ndërsa uzina komerciale “Infinity Two” synohet brenda një dekade. Kompania synon gjithashtu një partneritet prodhimi me Siemens-in.

“Nuk është një projekt shkencor eksperimental… e vetmja gjë që duam të mësojmë është që dizajni ynë për makinën e fuzionit në centralin energjetik të funksionojë siç është njoftuar”, tha Mowry për Reuters.

Fuzioni është studiuar prej dekadash, por përparimet në magnete, informatikë dhe materiale kanë nxitur një valë startup-esh që ndjekin energjinë e bollshme dhe të pastër, vëren Reuters.