UKRAINË – Rusia godet selinë e SBU-së në Kiev, 12 të plagosur

KIEV, 4 shtator /ATSH-DPA/ – Një dron rus i mbushur me eksploziv goditi sot selinë kryesore të Shërbimit të Sigurisë së Ukrainës (SBU), në qendër të Kievit, njoftoi presidenti ukrainas Volodymyr Zelensky.

Zelensky tha se droni ishte drejtuar drejtpërdrejt ndaj zyrës së kreut të SBU-së, Oleksandr Poklad.

Sipas autoriteteve të Kievit, të paktën 12 persona u plagosën nga sulmi.

Godina e SBU-së pësoi dëmtime në çati dhe në murin e jashtëm, ndërsa autoritetet konfirmuan se kanë nisur riparimet.

Zelensky paralajmëron kundërpërgjigje

Zelensky tha se i ka kërkuar kreut të SBU-së të përgatisë një sulm hakmarrës ndaj Rusisë, duke përdorur të njëjtën mënyrë.

Më vonë, pas një bisede me Poklad, ai tha se zona ku do të kryhet kundërpërgjigjja është përcaktuar, ndërsa koha do të zgjidhet për të siguruar rezultatet e synuara.

Sulmi preku gjithashtu zonën e Katedrales së Shën Sofisë, pjesë e një kompleksi të mbrojtur nga UNESCO.

Sipas administratës së saj, u thyen dritaret e një godine administrative të shekullit XVIII.

Ministri i Jashtëm ukrainas, Andrii Sybiha, e cilësoi sulmin si “një përshkallëzim të madh” dhe i bëri thirrje UNESCO-s dhe komunitetit ndërkombëtar të reagojnë.

Sulmi ndodhi në një kohë kur po bëhen përpjekje të reja për rifillimin e negociatave të paqes, të ndërmjetësuara nga SHBA-ja. /