Ushtria izraelite tërheq forcat e Brigadës Golani nga Libani jugor

Ushtria izraelite njoftoi të mërkurën se forcat e Brigadës Golani po tërhiqen nga Libani jugor për një “stërvitje gatishmërie strategjike”, siç raporton Al Jazeera në liveblog-un e saj. Trupat, që vepronin nën Divizionin e 36-të, kishin qenë të vendosura në atë që Izraeli e quan “linja e dytë e mbrojtjes” në zonën e Libanit jugor.

Sipas deklaratës së ushtrisë izraelite, forcat shkatërruan më shumë se 900 objekte të përdorura nga Hezbollahu gjatë operacioneve dhe gjetën depo armësh, baza ushtarake dhe infrastrukturë tunelesh. Ky është një ndër pretendimet më të mëdha të paraqitura nga Izraeli për dëmet e shkaktuara ndaj grupit libanez në një sektor të vetëm.

Tërheqja e Brigadës Golani vjen pas muajsh luftimesh intensive në jug të Libanit, ku Izraeli ka kryer një ofensivë tokësore dhe ajrore kundër Hezbollahut, duke krijuar edhe një “vijë të verdhë” sigurie brenda territorit libanez, të cilën ushtria izraelite thotë se do ta kontrollojë plotësisht.

Megjithatë, konfliktit në jug të Libanit nuk i shihet fundi: ushtria izraelite ka paralajmëruar se do të vazhdojë të veprojë kundër Hezbollahut, ndërsa Libani akuzon Izraelin për shkelje të vazhdueshme të sovranitetit të tij dhe për mbajtjen e trupave përtej kufirit.