Vllaznia me “firo” në sulm pas mbylljes së sezonit, huazimet lënë vetëm Bekim Balajn

Vllaznia nuk ia doli as këtë sezon të fitojë titullin kampion, edhe pse për pjesën më të madhe të sezonit ishte “violinë e parë”. Shkodranët bënë më keq se të gjithë në “Final 4”, duke i humbur të tria ndeshjet.

Vështirësitë më të mëdha në pjesën e fundit të kampionatit Vllaznia i pati në sulm, repart që me mbylljen e sezonit është i destinuar të tkurret, sepse dy lojtarë të tij duhet të lënë Shkodrën për t’u kthyer te klubet e tyre.

Bismark gjithë sezonin dhe Dodaj në gjysmën e dytë të tij luajtën në formë huazimi me fanellën kuqeblu. I pari duhet të kthehet te Skënderbeu, klubi që disponon kartonin e ti, kurse i dyti te CSKA e Sofjen në Bullgari për të njëjtën arsye.

Me këto dy largime Vllaznia humbet jo pak, por në favorin e saj ka kohën për të gjetur lojtarë të tjerë për të kompletuar repartin e avancuar para ndeshjeve europiane. Për momentin, kapiteni Balaj është vetëm.

Por edhe për të klubi shkodran duhet të gjejë një zëvendësues, pasi sulmuesi “veteran” është në metrat e fundit të karrierës. Kohët e fundit e ka vuajtur jo pak mungesën e golit.