Vlora Hyseni mbërrin në Gjykatën e Posaçme, flet për herë të parë: seanca me dyer të mbyllura

Ish-drejtoresha e Shërbimit Informativ të Shtetit (ShISh) në Shqipëri, Vlora Hyseni, e shoqëruar nga forca të shumta policie, ka mbërritur në zyrat e Gjykatës së Posaçme (GJKKO), ku sot pritet të njihet me masën e sigurisë. Hyseni aktualisht ndodhet nën masën arrest shtëpie.

Gjatë kalimit nga rruga drejt gjykatës, ish-drejtoresha e inteligjencës iu përgjigj shkurtimisht pyetjeve të gazetarëve. E pyetur nëse Agasit i janë kaluar nga ana e saj dokumente të klasifikuara, ajo u shpreh: “Si kalon ti në takime me agjentët serb në dhomat e hotelit Rogner”.

Siç raporton gazetarja e Top Channel, Anila Hoxha, seanca e sotme do të zhvillohet me dyer të mbyllura dhe vetëm pas saj pritet të mësohet vendimi i trupës gjyqësore dhe ajo çfarë do të diskutohet në sallë.

Ky është zhvillim i ri pas njoftimit të mëngjesit, kur Hyseni doli para GJKKO-së për konfirmimin e masës së sigurisë, në çështjen që ka ngritur pikëpyetje mbi sigurinë dhe besimin e aleatëve të Shqipërisë.

Fotoja kryesore tregon Hysenin të shoqëruar nga policia, duke mbërritur sot në gjykatë.

Burimi: Klan Kosova