Vrasja e efektivit Enea Mekolli, Gjykata e Korçës lë në burg autorin

Gjykata e Korçës ka vendosur masën e sigurisë “arrest me burg” për V.B. sot në 7 qershor, autorin e dyshuar të vrasjes së efektivit të policisë Enea Mekolli.

Vendimi u dha këtë të diel, më 7 qershor 2026, pas shqyrtimit të kërkesës së organit të akuzës. Gjykata vlerësoi të ligjshëm arrestimin në flagrancë të të dyshuarit për ngjarjen e rëndë.

Ai akuzohet për vrasjen e një punonjësi të Policisë së Shtetit, si dhe për vrasje të mbetur në tentativë ndaj një tjetër efektivi. Ndaj autorit rëndojnë gjithashtu akuza për mbajtje pa leje të armëve dhe municioneve. Sipas vendimit, masa e sigurisë do të vijojë deri në përfundim të hetimeve për çështjen.

Vendimi u shpall në ambientet e Spitalit Universitar të Traumës në Tiranë.

Njoftimi i policisë:

Përshëndetje të gjitheve!

VENDOSI:

1. Vleftesimin e ligjshëm të arrestit në flagrancë të personit nën hetim V.B, i dyshuar për kryerjen e veprave penale “Vrasje e punonjësve të policisë së shtetit”, “Vrasje e punonjësve të policisë së shtetit” ngelur në tentativë, “Mbajtje pa leje dhe prodhimi i armëve, armëve shpërthyese dhe i municionit” në formën e mbajtjes së armëve të zjarrit në ambiente publike dhe “Prodhimi dhe mbajtja pa leje e armëve të gjuetisë dhe sportive” në formën e mbajtjes së armës së gjuetisë dhe municionit, parashikuar prej neneve 79/b, 79b-22, 278/1 dhe 280 të Kodit Penal.

2. Caktimin ndaj personit nën hetim V.B, të masës së sigurimit personal “Arrest në burg” të parashikuar nga neni 238 i Kodit të Procedurës Penale.

3. Për ekzekutimin e këtij vendimi ngarkohet Prokuroria pranë Gjykatës së Shkallës së Parë të Juridiksionit të Përgjithshëm Korçë.

4. Kundër këtij vendimi mund të bëhet ankim në Gjykatën e Apelit të Juridiksionit të Përgjithshëm, brenda 5 (pesë) ditëve, duke filluar ky afat nga dita e nesërme e komunikimit të vendimit të arsyetuar të gjykatës.

U shpall nga Gjykata e Shkallës së Parë të Juridiksionit të Përgjithshëm Korçë në ambientet e Spitalit Universitar të Traumës Tiranë, sot më datë 07.06.2026.

Efektivi Enea Mekolli u vra më 4 qershor gjatë një operacioni policor në Lozhan të Maliqit, ku përpiqeshin të arrestonin një person të shpallur në kërkim. Pikërisht, ky i fundit qëlloi me armë në drejtim të policëve, duke e vrarë njërin prej tyre.

/tvklan.al