Zgjedhja e Prokurorit të Përgjithshëm, Adnan Xholi dorëzon kandidaturën e parë në KLP

Gara për zgjedhjen e drejtuesit të ri të Prokurorisë së Përgjithshme ka hyrë zyrtarisht në fazën e saj të parë. Prokurori i Strukturës së Posaçme, SPAK, Adnan Xholi, është zyrtari i parë që ka shprehur interesin për këtë post, duke dorëzuar zyrtarisht dosjen e tij të aplikimit pranë Këshillit të Lartë të Prokurorisë.

Adnan Xholi është një emër i njohur në sistemin e drejtësisë, ku më parë ka mbajtur detyrën e rëndësishme si Shef i Seksionit Kundër Krimit të Organizuar brenda SPAK-ut. Kjo nuk është hera e parë që ai garon për pozicione të nivelit të lartë drejtues, pasi në të kaluarën ka kandiduar dy herë edhe për postin e Drejtuesit të Strukturës së Posaçme.

Pritet që gara të pasurohet edhe me emra të tjerë, meqenëse afati përfundimtar për dorëzimin e kandidaturave është caktuar data 1 gusht, në orën 00:00. menjëherë pas mbylljes së aplikimeve, Këshilli i Lartë i Prokurorisë do të nisë fazën e shqyrtimit të dosjeve, ku deri më 14 gusht do të verifikohet me imtësi se cili prej kandidatëve plotëson kushtet dhe kriteret e përcaktuara me ligj.

Në përfundim të procedurës së verifikimit, ligji parashikon që KLP t’i propozojë Kuvendit të Shqipërisë tre kandidaturat më të vlerësuara. Më pas, do të jetë Parlamenti ai që do të votojë për të zgjedhur kryeprokurorin e ri, i cili do të marrë një mandat 7-vjeçar në krye të organit të akuzës. Çelja e këtij procesi vjen pasi Prokurorit të Përgjithshëm aktual, Olsian Çela, i përfundon zyrtarisht mandati në muajin dhjetor.