Zv.Ministrja e Brendshme: Të miturit nuk përjashtohen automatikisht nga përgjegjësia penale, situata është nën kontroll

Zëvendësministrja e Brendshme, Anisa Ruseti, u ka bërë thirrje të rinjve që të distancohen nga aktet e dhunës gjatë protestave, ndërsa u ka kujtuar atyre dhe familjeve të tyre pasojat ligjore që mund të sjellë përfshirja në veprime të kundërligjshme.

Në një deklaratë për mediat, Ruseti u ndal te incidentet e regjistruara gjatë ditës, përfshirë sulmin ndaj Gjykatës së Apelit në Tiranë, duke deklaruar se situata është nën kontroll dhe se Policia e Shtetit po vijon punën për garantimin e rendit dhe sigurisë publike.

“Pavarësisht akteve të veçuara të dhunës të regjistruara deri në këto orë të pasdites, përfshirë sulmin ndaj Gjykatës së Apelit në Tiranë, situata është nën kontroll dhe Policia e Shtetit është në krye të detyrës për garantimin e rendit dhe sigurisë publike”, deklaroi zëvendësministrja.

Ruseti theksoi se e drejta për të protestuar nuk i përjashton individët nga përgjegjësia për veprime të dhunshme, dëmtimin e pronës publike apo private, zjarrvënien, vjedhjen dhe mbajtjen e paligjshme të armëve apo mjeteve shpërthyese.

Një pjesë të rëndësishme të deklaratës, zëvendësministrja ia kushtoi përgjegjësisë ligjore të të miturve, duke sqaruar se mosha nuk përbën në çdo rast përjashtim automatik nga përgjegjësia penale.

“Sipas Kodit Penal, përgjegjësia penale për krimet fillon në moshën 14 vjeç, ndërsa për kundërvajtjet penale në moshën 16 vjeç. Përgjegjësia do të vlerësohet individualisht, mbi bazën e veprimeve dhe provave për secilin person, duke respektuar në çdo rast prezumimin e pafajësisë”, u shpreh Ruseti.

Ajo nënvizoi gjithashtu se askush nuk duhet të mbajë përgjegjësi për veprimet e të tjerëve vetëm për shkak se ndodhej në të njëjtën protestë. Sipas saj, mbrojtja e fëmijëve dhe respektimi i të drejtave të tyre do të udhëheqin veprimet e institucioneve shtetërore.

“Qëllimi ynë është një dhe i vetëm, të parandalojmë dëmtimin e të miturve dhe përfshirjen e mëtejshme të tyre në veprimtari të kundërligjshme”, deklaroi zëvendësministrja.

Në fund, Ruseti u bëri thirrje të rinjve që ndodhen pranë zonave të tensionuara të largohen nga përplasjet dhe të ushtrojnë të drejtën e protestës në mënyrë paqësore.

“Të rinjve që ndodhen pranë zonave të përplasjeve u bëjmë thirrje edhe një herë, largohuni nga dhuna! Mos lejoni që nxitja e dikujt tjetër, presioni i grupit apo thirrje në rrjetet sociale t’ju çojë drejt veprimeve që mund të rrezikojnë jetën tuaj dhe të të tjerëve! Ushtrojeni të drejtën tuaj për protestë në mënyrë paqësore dhe me përgjegjësi!”, apeloi ajo.

Zëvendësministrja falënderoi prindërit dhe kujdestarët që, sipas saj, iu përgjigjën thirrjes së institucioneve duke shoqëruar fëmijët në shkollë, me qëllim shmangien e përfshirjes së tyre në situata me rrezik përplasjeje. Ajo u kërkoi familjeve të vijojnë bashkëpunimin me institucionet dhe të bisedojnë me fëmijët jo vetëm për pasojat ligjore, por edhe për pasojat fizike dhe psikologjike të dhunës.