“16 zyrtarë dhe ish-zyrtarë të hetuar në 7 muaj”, kreu i SPAK: Prioritet avancimi me dosjet e mbartura

Kreu i Prokurorisë së Posaçme, Klodian Braho, zhvilloi këtë të martë një takim informal me gazetarët, ku prezantoi statistikat e institucionit për periudhën janar–korrik 2026 dhe foli për prioritetet e punës në muajt në vijim.

Braho bëri të ditur se gjatë shtatë muajve të parë të këtij viti janë hetuar 16 zyrtarë dhe ish-zyrtarë, ndërsa theksoi se fokusi kryesor i SPAK do të jetë avancimi i hetimeve për dosjet e mbartura.

Sipas statistikave të prezantuara, vlera totale e pasurive të sekuestruara nga SPAK gjatë vitit 2026 ka arritur në 440 milionë euro.

Kreu i SPAK theksoi se institucioni do të vijojë punën për hetimin e çështjeve të korrupsionit dhe krimit të organizuar, me synim përfundimin e dosjeve të mbartura dhe rritjen e efikasitetit të hetimeve.