19 vjet në “Downing Street”, Larry mbetet maçoku më i famshëm i qeverisë britanike

– Prej më shumë se një dekade, Larry është një nga banorët më të veçantë të “Downing Street”.

Maçoku Larry, i cili mbërriti në selinë e kryeministrit britanik në vitin 2011, ka kaluar aty vite të tëra dhe ka parë nga afër ndryshimin e qeverive dhe të kryeministrave.

Larry ka fituar statusin e një personazhi publik, ndërsa detyra e tij për të mbajtur nën kontroll brejtësit e ka bërë pjesë të pandashme të jetës në “Downing Street”.

I lindur në vitin 2007, ai u mor nga organizata për kujdesin e qenve dhe maceve të braktisura “Battersea Dogs & Cats Home” dhe mbërriti në “Downing Street” më 15 shkurt 2011.

Ai u dërgua në “Downing Street” për të ndihmuar në përballimin e problemit me brejtësit në godinë.

Fillimisht, ideja ishte që Larry të ishte edhe një kafshë shtëpiake për fëmijët e ish-kryeministrit të atëhershëm, David Cameron.

Megjithatë, ai u bë shpejt pjesë e stafit të “Downing Street” dhe mori titullin zyrtar “Gjuetari zyrtar i minjve i Zyrës së Kabinetit”.

Larry nuk është një pronë personale e kryeministrit britanik.

Ai qëndron në “Downing Street” si pjesë e stafit të institucionit dhe ka vazhduar të jetojë aty gjatë ndërrimit të qeverive.

Në vitin 2026, me ardhjen e kryeministrit Andy Burnham, Larry vazhdon ende detyrën e tij.

Me rreth 19 vjet, Larry është tashmë një nga banorët më jetëgjatë të “Downing Street”.

Ai ka qenë i pranishëm gjatë drejtimit të shtatë kryeministrave britanikë: David Cameron, Theresa May, Boris Johnson, Liz Truss, Rishi Sunak, Keir Starmer dhe tani Andy Burnham.

Pavarësisht reputacionit të tij si “kapës minjsh”, Larry nuk ka qenë gjithmonë shumë aktiv në këtë detyrë.

Megjithatë, ai është fotografuar dhe filmuar disa herë duke kapur ose ndjekur brejtës.

Në prill 2026, ai u filmua sërish duke kapur një mi përpara kamerave televizive.

Kësaj radhe, Larry është parë duke kapur një brejtës dhe më pas duke u kthyer pa shumë bujë në “Downing Street” – duke i dhënë një tjetër moment publiciteti maçokut më të famshëm të politikës britanike. /