Akses i lehtë dhe më shumë siguri për vizitorët e Kalasë së Lezhës

Falë rikonstruksionit të plotë të strukturës lidhëse mes parkingut dhe rrugës që të çon drejt Kalasë së Lezhës, vizitorët do të kenë akses më të sigurt dhe më të lehtë.

Ministri i Turizmit, Kulturës dhe Sportit, Blendi Gonxhja, përcolli në rrjetet sociale pamje nga pasarela e re.

“Ura prej druri, e ndërtuar shumë vite më parë, ishte amortizuar plotësisht, ndaj u realizua një pasarelë e re, më solide dhe funksionale, me strukturë mbajtëse metalike dhe dysheme druri”, sqaroi ministri Gonxhja, duke e cilësuar këtë ndërhyrje si, një hap të rëndësishëm për ta bërë trashëgiminë tonë kulturore më të aksesueshme, më të sigurt dhe më mikpritëse për të gjithë.

Ndërhyrja përmirëson sigurinë e vizitorëve, lehtëson aksesin edhe për personat me aftësi të kufizuara, duke shmangur shkallët e strukturës së mëparshme, si dhe kontribuon në mbrojtjen e strukturave arkeologjike të nekropolit lindor të Lezhës, që ruhen në këtë pjesë të territorit.