Aldo Shllaku, kompozitori i filmave të Hollywood-it në TKOB

Mbrëmjen e djeshme në Teatrin Kombëtar të Operës e Baletit, u interpretuan kolonat zanore të filmave të Hollywood-it të kompozuara nga kompozitori shqiptar Aldo Shllaku.

Krijimet e Aldo Shllaku, të cilat kanë shoqëruar disa prej filmave më të njohur të Hollywood-it, morën jetë në skenën e TKOBAP-së përmes interpretimit të Orkestrës Simfonike dhe Korit të TKOBAP-së.
Nën dirigjimin e vetë kompozitorit, publiku përjetoi një mbrëmje të veçantë vere, ku muzika që ka emocionuar miliona spektatorë në mbarë botën u interpretua me mjeshtëri, duke krijuar një atmosferë plot emocion.

Me pjesëmarrjen e artistes Ayana Haviv në vokal dhe Jeff Hoeppner në tastierë, koncerti solli në Tiranë tingujt e kinemasë botërore, duke dëshmuar se muzika e filmit ka fuqinë të kapërcejë kufijtë dhe të bashkojë publikun përmes emocioneve të përbashkëta.

Aldo Shllaku konsiderohet një nga kompozitorët shqiptarë më të njohur në fushën e muzikës së filmit në arenën ndërkombëtare. Karriera e tij është e lidhur kryesisht me industrinë ndërkombëtare të filmit. Shllaku ka kompozuar kolonat zanore të dhjetëra filmave, sipas IMDb. Muzika e tij karakterizohet nga ndërthurja e elementeve orkestrale me tinguj modernë dhe është vlerësuar për aftësinë për të mbështetur narrativën filmike.

Në filmat, muzikën e të cilëve e ka kompozuar Shllaku, interpretojnë aktorë si De Niro, Morgan Freeman, Tommy Lee Jones, Jean-Claude Van Damme, John Travolta, Brendan Fraser etj.