Ardian Çela i përgjigjet Vladimir Kostës: Ka pasur kërkesa absurde për të fituar tendera të paligjshëm

Një ditë pas letrës së deputeti socialist Vladimir Kosta i cili lajmëroi largimin nga ky grup parlamentar, duke akuzuar Edi Ramën dhe një sërë bashkëpunëtorësh të kreut socialist, reagoi edhe administratori i OSHEE-së, Adrian Çela.

Administratori i OSHEE-së i përgjigjet deputetit Kosta se ky i fundit ka pasur kërkesa absurde për të fituar në rrugë të paligjshme tenderë të shpallur nga OSHEE.

“Shpreh keqardhje të thellë për prononcimin e deputetit Vladimir Kosta, por nuk jam i keqardhur që nuk i’a kam plotësuar kërkesat e tij absurde për të fituar në rrugë të paligjshme tenderë të shpallur nga OSHEE. Fatkeqësisht nuk më vjen e papritur kjo shfaqje vulgariteti vetediskreditues që flet vetë për nivelin e Vladimir Kostës.

Sulmin e tij në vigjilje të finalizimit të Reformës në Drejtësi e marr si kompliment për kompaninë dhe për drejtimin tim me ligjshmëri dhe transparencë. Reforma në Drejtësi ende pa u miratuar po tregon se çfarë vlere të madhe ka për të ndarë njerëzit që duan shtet, drejtësi, rregulla nga ata që duan të vazhdojnë në rrugën e vjetër të përfitimeve të paligjshme”, thuhet në reagimin e administratorit të OSHEE-së.