Arrestohen 3 ish-punonjës të Hipotekës për falsifikim dokumentesh

Tre ish-punonjës të Hipotekës në Lezhë u arrestuan sot pasi akuzohen për veprat penale “Falsifikim dokumentesh” dhe “Shpërdorim detyre”. Policia nisi procedimin penal për tre të tjerë, ndërsa u shpall në kërkim një noter.

Shtatë ish-punonjësit akuzohen pasi në vitin 2006, dyshohet se kanë falsifikuar dokumentacionin e një sipërfaqeje prej 15 mijë metrash katrorë, tokë arë, duke e kaluar pronësinë e saj nga personat me iniciale L.M., Gj.M. dhe F.M. në favor të shtetit, e më pas në pronësi të dy të tjerëve me inicialet N.P. dhe P.C, regjistrimi i së cilës është bërë në ZVRPP-në e Kurbinit.

U deshën 3 muaj hetime me metoda speciale që Sektori i Krimit Ekonomik dhe Financiar në Policinë e Lezhës, në bashkëpunim me Prokurorinë e Kurbinit, të ndalonte shtetasit : Haxhi Lika, 59 vjeç, banues në Rubik Mirditë, ish-kryetar i Komisionit të Tokës, Ndue Gega, 52 vjeç, banues në Lezhë, inxhinier topograf,  ish-specialist në ZVRPP Kurbin dhe Halit Ajazi,  51 vjeç, banues në Laç Kurbin, ish-përgjegjës i Sektorit të administrimit dhe Mbrojtjes së Tokës Kurbin.