ASH: Studimet mbi ADN e hershme rikonfirmojnë autoktoninë e shqiptarëve

Një studim i ri i botuar në revistën ndërkombëtare “Nature Human Behaviour” ka sjellë dëshmitë më të qarta deri më sot mbi origjinën e shqiptarëve, duke konfirmuar vazhdimësinë e tyre gjenetike që nga Epoka e Bronzit deri në ditët e sotme. Ky punim u realizua nga një ekip ndërkombëtar studiuesish, në bashkëpunim me Akademinë e Shkencave të Shqipërisë dhe përfshiu analizën e mbi 6,000 gjenomeve të lashta nga Ballkani dhe Eurazia Perëndimore, si dhe 74 gjenome të reja nga shqiptarët modernë.

ASH shprehet se në këtë studim janë përdorur të dhëna të përftuara nga analizat e gjenetikës molekulare të mbështetura në ADN-në e lashtë (aADN), si dhe teknika të sofistikuara statistikore, përfshirë metodën ancient identity-by-descent (ancIBD), e cila lejon gjurmimin e lidhjeve të thella gjenealogjike midis popullatave moderne dhe individëve të lashtë. “Rezultatet tregojnë se, ndryshe nga pjesa më e madhe e Europës Juglindore e cila u riformësua nga migrime masive, paraardhësit e shqiptarëve mbetën krahasimisht të paprekur, duke ruajtur lidhje të forta me popullsitë autoktone të Ballkanit.

Një zbulim i veçantë lidhet me një individ të shekujve IX-X nga Shtika në jug të Shqipërisë, i cili rezulton gjenetikisht më i afërt me shqiptarët e sotëm sesa me çdo popullsi tjetër të njohur. Ky fakt përbën dëshminë e parë të drejtpërdrejtë gjenetike për një bashkësi të hershme shqipfolëse, shumë kohë përpara se gjuha shqipe të dokumentohej me shkrim.

Studimi konfirmon se shqiptarët rrjedhin kryesisht nga popullsi autoktone ballkanike, duke ruajtur identitetin e tyre përmes shekujve, ndërkohë që dallimet e holla gjenetike midis gegëve dhe toskëve pasqyrojnë zhvillime historike rajonale”, thuhet nga ASH. Akademia e Shkencave e Shqipërisë shprehet se po vazhdon punën për studime më të thelluara mbi gjenetikën e popullatës shqiptare, duke synuar të sjellë prova edhe më të plota mbi autoktoninë e padiskutueshme të shqiptarëve dhe rolin e tyre unik në historinë e Europës.