Atletico Madrid, finalisti i parë i Champions League

Atletico Madrid është skuadra e parë finaliste e Ligës së Kampioneve. Skuadra e drejtuar nga Diego Pablo Simeone eliminoi Bajernin e Mynihut  me gol në fushën kundërshtare. Në “Allianz Arena” bavarezët fituan 2-1, por humbja 1-0 në “Vicente Calderon” çon në Milano bardhekuqtë.

Ishte Xabi Alonso ai që kaloi në avantazh bavarezët në pjesën e parë, ndërsa disa minuta pas golit, Thomas Muller humbi një 11-metërsh. Kjo i dha krahë miqve, të cilët në fillimin e pjesës së dytë barazuan me anë të Griezmann.

Antonie Griezman është i lumtur për kalimin në finale të Ligës së Kampionëve. Sulmuesi i Atletico Madridit, Antonie Griezmann, e ka pranuar se Bayern Munich ka skuadër shumë të mirë, por tha se ata kanë një qëllim dhe ai është titulli. Ishte pikërisht Griezmann ai që shënoi golin për Atleticon, gol që siguroi finalen e Milanit. “Bayern është skuadër e madhe. Ne u mbrojtëm shumë mirë dhe fitoi skuadra më e mirë. Ne kemi një qëllim shumë të rëndësishëm, por duhet të qëndrojmë me këmbë në tokë. Kemi kohë deri në finale”, tha Griezmann pas ndeshjes.

Sulmet e njëpasnjëshme të Bajernit bënë që lojtarët e Guardiolës të shënonin sërish me Levandovskin, por kjo fitore nuk i mjafton për të kaluar në finale. Ndeshja e kthimit e gjysmëfinalistes tjetër, Real Madrid-Manchester City do të luhet mbrëmjen e së mërkurës, ndeshja e parë mes dy ekipeve u mbyll në barazim pa gola.
Finalja e Champions këtë edicion do të zhvillohet më 28 Maj në “San Siro”.