BE marrëveshje partneriteti prej 200 milionë eurosh me Groenlandën

Presidentja e Komisionit Evropian, Ursula von der Leyen njoftoi të hënën një marrëveshje partneriteti me Groenlandën me vlerë 200 milionë euro, e cila sipas saj thekson rëndësinë strategjike të ishullit Arktik për Bashkimin Evropian.

“Groenlanda mund të mbështetet te BE-ja. Ky ishte mesazhi im gjatë vizitës sime të fundit. Sot, jam kthyer për të dhënë rezultatet e vërteta të bashkëpunimit tonë të ngushtë. Me një paketë të re Partneriteti BE-Groenlandë, me vlerë 200 milionë euro”, tha Von der Leyen.

Paketa financiare, që do të investohet këtë vit dhe në vitin 2027, do të përqendrohet në lidhjen dixhitale, minierat e qëndrueshme, energjinë dhe turizmin, si dhe arsimin, peshkimin dhe strehimin.

“Kjo do të krijojë mundësi të reja dhe një BE të fortë dhe të angazhuar si në Groenlandë ashtu edhe në Arktik. Sepse Groenlanda është një aleat strategjik dhe një mik i besuar”, shtoi ajo.

Udhëtimi i Von der Leyen në Groenlandë vjen në mes të këmbënguljes së vazhdueshme të Presidentit të SHBA-së, Donald Trump, se ishulli arktik duhet t’i përkasë Shteteve të Bashkuara.