Berisha me studentët e “Sciences Po”: Shqipëria e ka vendin në BE, korrupsioni pengesa kryesore

Kreu i PD tha se vendi duhet të thellojë reformat dhe të rrisë transparencën për të avancuar në procesin e integrimit europian.

Kryetari i Partisë Demokratike, Sali Berisha, zhvilloi një bashkëbisedim me studentë të institutit francez “Sciences Po”, ku u ndal te ekonomia, administrata publike dhe rruga e Shqipërisë drejt Bashkimit Europian.

Në fjalën e tij, Berisha u shpreh se Shqipëria e ka vendin në BE, por sipas tij korrupsioni mbetet pengesa kryesore për përparimin e vendit. Ai kërkoi reforma strukturore, lehtësim të procedurave administrative, ulje të barrës fiskale dhe më shumë transparencë në prokurimet publike përmes digjitalizimit.

Berisha kritikoi gjithashtu mënyrën se si po zhvillohen tenderimet dhe tha se praktikat aktuale dekurajojnë pjesëmarrjen e kompanive nga vendet e Bashkimit Europian. Në vijim, ai kundërshtoi modelet e integrimit të pjesshëm dhe ritheksoi se e ardhmja e Shqipërisë dhe e Ballkanit Perëndimor duhet të mbetet anëtarësimi i plotë në BE.

Burimi: RTSH