BLERIM GJELADINI: Për “ekspertin” që e fabrikoi letrën — disa fjalë nga zemra

I dashur falsifikator anonim, të përgëzoj. Vërtet. Ke marrë guximin të imitosh një dokument të UÇK-së dhe ke dështuar me një stil aq spektakolar sa meriton një medalje — por jo nga ata që pretendon ti.

Le t’i numërojmë mjeshtëritë e tua:

Shkrove “kërr”. Me ë. Një kosovar do ta shkruante kerr edhe në gjumë. Ti e fute ë-në me aq dashuri, sa e tradhtove dorën tënde toskëre që në fjalinë e tretë. Bravo. Spiun i përkryer — vetëm fjalori të kapi.

Pastaj, gjeniu, në një dokument zyrtar ushtarak shkrove zhargon rruge. “I solli me një kërr.” Po pse mor, UÇK-ja kishte makina apo kerra? Shtabi i Përgjithshëm fliste si te kafja e lagjes?

E pastaj kryevepra: “Dylaver”. Dy herë. E ke fyer njeriun edhe në falsifikim. Kolonelin Dilaver Goxhaj nuk ia di emrin “shtabi” që gjoja po i shkruan zv.shefit të vet të Shtabit të Përgjithshëm. Kjo është si të falsifikosh kartën e identitetit dhe ta shkruash emrin gabim — të dy herë.

Por ja ku është gjëja më e bukur: e shkrove si tregim. Me dialog. Me moral në fund. Vëlla, ky nuk është njoftim ushtarak — ky është tregim për fëmijë, i mungojnë vetëm ariu dhe dhelpra.

Këshilla ime miqësore: herën tjetër, para se të falsifikosh, lexo një dokument të vërtetë. Ose më mirë akoma — mos.