BREGU PERËNDIMOR – ABBAS shtyn zgjedhjet parlamentare palestineze për në shtator 2027

RAMALLAH, 11 tetor /ATSH-AFP/ – Presidenti palestinez Mahmoud Abbas ka shtyrë zgjedhjet parlamentare për më 11 shtator 2027 në njoftuan mediet zyrtare palestineze.

Zgjedhjet e para parlamentare që nga viti 2006 ishin planifikuar të mbaheshin më 28 nëntor, ndërsa zgjedhjet presidenciale pritej të zhvilloheshin në fillim të vitit 2027.

Sipas dekretit të presidentit Abbas, të dy proceset zgjedhore do të zhvillohen në të njëjtën datë.

Abbas e justifikoi shtyrjen me pengesat që, sipas tij, po vendos Izraeli, si dhe me mungesën e kushteve të përshtatshme politike dhe të sigurisë.

Autoriteti Palestinez deklaroi se Izraeli kishte refuzuar t’u lejonte zyrtarëve palestinezë të zgjedhjeve të hynin në Jerusalemin Lindor dhe në Gazë për përgatitjen e votimeve.

Megjithatë, ministri i Jashtëm izraelit Gideon Saar mohoi akuzat, duke i cilësuar pretendimet e Abbasit si përpjekje për t’iu shmangur përgjegjësisë.

Vendimi ka shkaktuar kritika nga figura të ndryshme palestineze.

Mohammed Dahlan, drejtues i një grupimi të shkëputur nga partia Fatah, e cilësoi shtyrjen si një “krim kundër demokracisë”, duke akuzuar Abbasin se i ka kthyer institucionet e Autoritetit Palestinez në struktura që u shërbejnë interesave të një rrethi të ngushtë.

Edhe gazetari Esmat Mansour vuri në pikëpyetje arsyetimin zyrtar, duke pretenduar se frika nga rezultati i zgjedhjeve mund të jetë një faktor i rëndësishëm.

Nga ana tjetër, analisti palestinez Ghassan al-Khatib tha se kushtet aktuale nuk favorizojnë zhvillimin e zgjedhjeve. Ai përmendi shkatërrimet dhe dhunën e vazhdueshme në Rripin e Gazës, operacionet ushtarake izraelite dhe dhunën e kolonëve në Bregun Perëndimor.