Budvë: Hiqet transparenti në mbështetje të studentëve serbë kundër regjimit të Vuçiqit

Inspeksioni komunal i Budvës hoqi të dielën në mëngjes transparentin e madh që kishte dalë mbi muret e Kalasë së Vjetër të Budvës, mbi hyrjen kryesore, siç njofton gazeta malazeze “Vijesti”. Në transparent shkruhej: “Studentët po shkruajnë historinë, ndërsa ‘çaçët’ ende po mësojnë alfabetin. Pompo!” — dhe ishte vendosur në shenjë mbështetjeje për studentët në Serbi që kundërshtojnë regjimin e Aleksandar Vuçiqit.

Sipas inspeksionit komunal të Budvës, transparenti u hoq pas reagimit të shpejtë të shërbimit, me asistencën e ndërmarrjes publike “Komunalo”. Për vendosjen e tij, thanë për “Vijesti” nga inspeksioni, nuk ishte lëshuar pëlqimi i Institutit për Mbrojtjen e Monumenteve Kulturore-Historike të Malit të Zi dhe as miratimi i organit kompetent të Komunës së Budvës.

Më herët po atë ditë, inspeksioni i kishte thënë “Vijesti”-t se do të kryente mbikëqyrje inspektuese për rastin, pasi transparenti ishte shfaqur që në orët e para të mëngjesit. Kalaja e Vjetër e Budvës është monument kulture nën mbrojtje, ndaj çdo ndërhyrje në muret e saj kërkon leje të posaçme.

Vendosja e transparentit vjen në prag të zgjedhjeve të parakohshme parlamentare në Serbi, të caktuara për më 25 tetor, ku listën e Partisë Progresive Serbe (SNS) e kryeson ish-presidenti Aleksandar Vuçiq, ndërsa i pari në Listën Studentore është doktori Ilija Srdanoviq.