Milatović në Vatikan me kardinalin Parolin: hapja e nunciaturës apostolike në Podgoricë do të forconte lidhjet me Selinë e Shenjtë

PODGORICË, 4 tetor – Presidenti i Malit të Zi, Jakov Milatović, u takua në Vatikan me sekretarin e Shtetit të Selisë së Shenjtë, kardinalin Pietro Parolin, siç njofton televizioni publik malazez RTCG-ja. Në takim u bisedua për forcimin e mëtejshëm të marrëdhënieve mes Malit të Zi dhe Selisë së Shenjtë, si dhe për drejtime konkrete të bashkëpunimit.

Sipas RTCG-së, vëmendje e veçantë iu kushtua vazhdimit të aktiviteteve për hapjen e Nunciaturës Apostolike në Podgoricë, e cila do të shërbente si kontribut për lidhje më të forta institucionale mes dy palëve.

“Marrëdhëniet tona kanë rrënjë të thella historike, por duam t’i forcojmë më tej përmes rezultateve konkrete dhe bashkëpunimit më të fortë institucional. Hapja e Nunciaturës Apostolike në Podgoricë do të ishte një hap i rëndësishëm në këtë drejtim”, tha Milatović gjatë takimit.

Palët diskutuan gjithashtu, sipas njoftimit, bashkëpunimin në fushën e kulturës dhe mbrojtjen e trashëgimisë së pasur kulturore dhe sakrale, si dhe rëndësinë e dialogut ndërfetar, paqes dhe respektit të ndërsjellë.

Milatović theksoi se Mali i Zi, si shtet multietnik dhe multikonfesional, e çmon veçanërisht kontributin e komunitetit katolik. Gjatë takimit, presidenti malazez i dhuroi kardinalit Parolin një vepër arti me detajin e antependiumit të Katedrales së Shën Triphonit në Kotorr, simbol i traditës shekullore shpirtërore e kulturore të Gjirit të Kotorrit, raporton RTCG-ja.