Buxheti me vrimë 6–7 miliardë denarë nga ulja e akcizave dhe TVSH-së për karburantet

Karburantet e shtrenjta po ushtrojnë sërish presion mbi Buxhetin e Maqedonisë së Veriut. Për të zbutur rritjen e çmimeve të karburanteve dhe goditjen ndaj standardit të qytetarëve dhe ekonomisë, Qeveria ndërhyri me uljen e akcizave dhe TVSH-së, por kështu ulën edhe të ardhurat në arkën shtetërore. Sipas vlerësimeve më të fundit, deri në fund të këtij viti të ardhurat buxhetore nga këto zëra mund të jenë 6 deri në 7 miliardë denarë më të ulëta, rreth 97–113 milionë euro, siç njofton gazeta Вечер Прес.

Kryeministri Hristijan Mickoski paralajmëroi se është e mundur që deri në fund të vitit të ketë edhe një rebalance tjetër të Buxhetit. “Presim që deri në fund të vitit të jemi 6–7 miliardë denarë më pak se sa kemi planifikuar dhe për këtë arsye mund të kemi edhe një rebalance deri në fund të vitit”, deklaroi Mickoski. Ai theksoi se prioritet i Qeverisë mbetet mbrojtja e standardit të qytetarëve, kontrolli i inflacionit dhe mbajtja e çmimeve të ulëta të karburanteve.

Ministrja e Financave, Gordana Dimitrieska-Koçoska, tha se deri në fund të vitit nuk pret ndryshime të rëndësishme në parashikimet për rritjen ekonomike dhe deficitin buxhetor, dhe se edhe nëse ka rebalance të ri, do të punohen shkurtime si në anën e të ardhurave, ashtu edhe në atë të shpenzimeve.

Ndërkohë, pasiguria në tregjet botërore të energjisë vazhdon. Akademiku Taki Fiti paralajmëron se një goditje e re naftare mund të çojë në stagflacion — kombinim i rritjes së ngadaltë ekonomike, inflacionit më të lartë dhe papunësisë në rritje. Maqedonia e Veriut, si vend i varur nga importi që nuk prodhon naftë, është veçanërisht e ndjeshme ndaj këtyre presioneve të jashtme, sipas tij.

Çmimi i karburanteve mbetet kështu jo vetëm çështje ekonomike e sociale, por edhe serioze fiskale. Sa më gjatë të ndërhyjë shteti për të mbajtur çmimet të ulëta, aq më i madh është presioni mbi të ardhurat buxhetore.