Bylykbashi dhe Balla takim me ekspertët amerikanë për aktet nënligjore të dekriminalizimit

Paraditen e sotme, rreth orës 09.00 në ambientet e Kryesisë së Kuvendit ka nisur një takim mes bashkëdrejtuesve të komisionit të posaçëm parlamentar për dekriminalizimin Oerd Bylykbashi dhe Taulant Balla me një grup ekspertësh amerikanë. Në nisje të këtij takimi i pranishëm ishte dhe ambasadori i Shteteve të Bashkuara të Amerikës Donald Lu. Fokusi i takimit, tashmë pas miratimit në parim të dekriminalizimit në Kuvend është hartimi i akteve nënligjore që do të çojnë në zbatimin praktik të këtij ligji kaq shumë të diskutuar në politikën shqiptare. Zoti Lu është larguar nga takimi pas fillimit të diskutimeve të teknikaliteteve mes përfaqësuesve të dy palëve.