Çitaku akuzon Qeverinë: Ligjet e tjera me procedurë të përshpejtuar, për Specialen zvarritje

Nënkryetarja e PDK-së, Vlora Çitaku, ka akuzuar Qeverinë e Kosovës se po zvarrit projektligjin për Dhomat e Specializuara, ndërkohë që projektligje të tjera po kalojnë me procedura të përshpejtuara në Kuvend. Siç raporton Klan Kosova, Çitaku e bëri akuzën në një postim në Facebook, ku thekson se komisionet parlamentare po përcjellin me nxitim një numër të madh projektligjesh qeveritare pa analizë të mjaftueshme, pa debat substancial dhe pa dëgjime publike.

“Drejtësia nuk reformohet duke shmangur shqyrtimin parlamentar. Ky nxitim ngre dyshime serioze se ligjet po i përshtaten agjendës politike të pushtetit”, ka shkruar ajo.

Sipas raportimit të Klan Kosovës, Çitaku ka veçuar projektligjin për ndryshimin e Ligjit për Dhomat e Specializuara, të cilin PDK-ja e ka dorëzuar në Kuvend më 21 shtator. Ajo pretendon se, ndërsa ligjet e tjera po trajtohen me procedurë të përshpejtuar, ky projektligj po mbahet “në sirtarin e ministres” së Drejtësisë, Donika Gërvalla, me justifikimin e “ekspertizës ligjore”.

“Për ligjet e tjera, procedura të përshpejtuara. Për mbrojtjen e UÇK-së, zvarritje!”, ka shkruar Çitaku.

Ajo i ka bërë thirrje kryeministrit Albin Kurti dhe ministres Gërvalla që ta procedojnë projektligjin menjëherë në Kuvend: “Mos e pengoni këtë projektligj. Procedojeni menjëherë në Kuvend”. Çitaku iu referua edhe protestave në Prishtinë, duke i kërkuar Qeverisë të dëgjojë “popullin që tash e 15 ditë është në shesh”.

“Çdo ditë vonesë vetëm sa ka për ta rënduar përgjegjësinë tuaj. Dhe më besoni: dita e llogaridhënies do të vijë!”, përfundon postimi i saj. Qeveria mblidhet sot nga ora 11:00 me 35 pika në rend dite — shumë projektligje, por jo ai për Dhomat e Specializuara.