Cramon i reagon Grenellit për pikën kufitare në Merdare: Herën tjetër sillni edhe pak para

Raportuesja për Kosovë në Parlamentin Evropian, Viola von Cramon, i ka reaguar ish të dërguarit të Donald Trump për dialogun Kosovë – Serbi, Richard Grenell.

Cramon reagoi pasi Grenell tha se Trump e vuri në funksion stacionin e ri të kalimit në pikën kufitare në Merdare.

Ajo tha se një gjë e tillë do të ishte mirë, nëse do të ishte e vërtetë.

“Pika kufitare në Merdare u ndërtua nga 6 milionë euro, para të taksapaguesve të BE-së. Herën tjetër, në vend që të riemërtoni Liqenin e Ujmanit, sillni edhe pak para”, ka shkruar Cramon.

Ky reagim erdhi pasi Grenell kaloi përmes pikës kufitare në Merdare për në Serbi, duke thënë se këtë pikë e vuri në funksion Trump.

“Donald Trump e vuri në funksionim këtë stacion të ri kalimi si pjesë e 4 Marrëveshjeve të Normalizimit Ekonomik që ai arriti”, ka shkruar Grenell në llogarinë e tij në Twitter.