DAMASK – Nëntë të vrarë nga shpërthimi në një bar

DAMASK, 2 korrik /ATSH-DPA/ – Të paktën nëntë persona humbën jetën dhe 19 të tjerë u plagosën pas shpërthimit të një mjeti shpërthyes të improvizuar (IED) brenda një kafeneje në qendër të Damaskut, njoftuan burime mjekësore.

Shpërthimi ndodhi rreth mesditës në një lokal pranë Pallatit të Drejtësisë, në lagjen ”al-Hamidiyah”.

Sipas autoriteteve shëndetësore, bilanci i viktimave u rrit gjatë mbrëmjes në nëntë të vdekur, ndërsa disa prej të plagosurve ndodhen në gjendje kritike.

Kreu i Shoqatës së Avokatëve të Sirisë, Mohammed al-Tawil, tha se kafeneja ishte një vendtakim i zakonshëm për avokatët.

Sipas tij, gjashtë nga viktimat e identifikuara janë avokatë, ndërsa tetë të tjerë kanë mbetur të plagosur.

Guvernatori i Damaskut, Maher Marwan, deklaroi se shpërthimi u shkaktua nga një mjet shpërthyes i improvizuar dhe se forcat e sigurisë po analizojnë pamjet e kamerave të sigurisë për të identifikuar autorët.

Video të publikuara në rrjetet sociale tregojnë persona të plagosur brenda kafenesë, ndërsa autoritetet konfirmuan se të gjitha viktimat janë civilë.

Sipas guvernatorit, shpërthimi ndodhi pranë gjykatës ku po zhvillohen procese ndaj personave të akuzuar për vrasje gjatë regjimit të ish-presidentit Bashar al-Assad, qeveria e të cilit u rrëzua në vitin 2024. /Ad.Ab./ a.jor.