Delegacioni i BE-së shpërndan takimin e Gonazatos me Kryetarin e GJKKO Erion Bani

Godina e Gjykatës së Posaçme kundër Korrupsionit dhe Krimit të Organizuar është rikonstruktuar së fundmi për të përmbushur standardet më të larta të Bashkimit Europian, ndërsa financimi i projektit është mbështetur nga BE.

Gjatë një vizite në ambientet e rikonstruktuara të GJKKO-së, u bë e ditur se 80% e kostos së investimit është mbuluar përmes ripërdorimit të aseteve të konfiskuara, në kuadër të luftës kundër korrupsionit dhe krimit të organizuar.

Në takimin e zhvilluar me këtë rast, Kryetari në detyrë i Gjykatës së Posaçme të Shkallës së Parë, gjyqtari Erion Bani, dhe Ambasadori i Bashkimit Europian në Shqipëri, Silvio Gonzato, diskutuan mbi rolin e Gjykatës në forcimin e besimit të publikut te sistemi i drejtësisë dhe rëndësinë e ruajtjes së standardeve të larta në vendimmarrje.

Ambasadori Gonzato theksoi se përmirësimi i infrastrukturës gjyqësore duhet të mbetet prioritet në të gjithë Shqipërinë, me qëllim garantimin e sigurisë, transparencës dhe aksesit të qytetarëve në drejtësi.

Sipas përfaqësuesve të BE-së, investime të tilla synojnë të mbështesin më tej konsolidimin e reformës në drejtësi dhe forcimin e institucioneve të pavarura në vend.