Dita e Evropës, ministri Hoxha pret nxënësit ekselentë: Shqipëria evropiane fillon me ju! – Tv Klan

Në ditën e Evropës, ministri për Evropën dhe Punët e Jashtme, Ferit Hoxha, priti në zyrën e tij, një grup nxënësish të dalluar të shkollave 9 vjeçare nga e gjithë Shqipëria, në një bashkëbisedim për Bashkimin Evropian dhe rrugëtimin e vendit drejt familjes evropiane.

Gjatë ceremonisë së mirëseardhjes ku merrnin pjesë ambasadori i BE-së Silvio Gonzato dhe ambasadorë të vendeve anëtare, ministri deklaroi se ky brez i ri është shpresa më e madhe jo vetëm e Shqipërisë, por edhe e Evropës që duam të ndërtojmë.

“E ardhmja jonë evropiane nuk do të ndërtohet vetëm në Bruksel apo në kryeqytetet e mëdha. Ajo do të ndërtohet së pari këtu, nga fëmijë dhe të rinj si ju, në Tiranë, në Shkodër, në Korçë, në Vlorë dhe kudo ku mendjet e reja ëndërrojnë një të nesërme më të mirë”, tha Hoxha.

Ai shtoi se e ardhmja e Shqipërisë në Evropë nuk është vetëm një projekt politik. Por është projekti i brezit të ri.

“I fëmijëve që ëndërrojnë më shumë, dinë më shumë dhe nuk njohin kufij për talentin, dijen dhe ambicien e tyre. Sepse Shqipëria evropiane fillon me ata. Fillon këtu”, theksoi më tej ministri Hoxha.