Dita Ndërkombëtare për Ruajtjen e Shtresës së Ozonit

Çdo 16 shtator, OKB tërheq vëmendjen mbi Ditën Ndërkombëtare për Ruajtjen e Shtresës së Ozonit.

Shtresa e ozonit është shumë e rëndësishme pasi mbron Tokën nga rrezatimi i dëmshëm ultravjollcë (UV) i Diellit, ul rrezikun e kancerit të lëkurës dhe dëmtimeve të syve te njerëzit, mbron bimët, kafshët dhe organizmat detarë nga dëmtimet e rrezatimit UV. Ajo shërben si një mburojë natyrore që mbron jetën në Tokë.

Tema e aktiviteve kushtuar kësaj dite, për vitin 2026, është “Veprim global për një planet më të freskët”.

Është konstatuar se një sërë kimikatesh të përdorura gjerësisht janë jashtëzakonisht të dëmshme për shtresën e ozonit. Konfirmimi shkencor i shkatërrimit të shtresës së ozonit e nxiti komunitetin ndërkombëtar të krijonte një mekanizëm bashkëpunimi për të ndërmarrë veprime për mbrojtjen e shtresës së ozonit, përmes konventave te ndryshme si ajo e Vjenes, Protokolli i Montrealit, Amendamenti i Kigalit etj. Synimi i këtyre marrëveshjeve është kufizimi dhe eliminimi i substancave që dëmtojnë shtresën e ozonit.

Konventa e Vjenës dhe Protokolli i Montrealit u bënë të parat traktate në historinë e OKB të cilat u ratifikuan globalisht më 16 shtator të vitit 2009.