Dizeli shkon 104,5 denarë për litër nga mesnata, benzina bie — SDSM: Mickoski refuzoi masat, populli paguan

Nga mesnata e 22 shtatorit hyjnë në fuqi çmimet e reja të derivateve të naftës, sipas vendimit të Komisionit Rregullator për Energjetikë. Me vendimin e ri, dizeli do të shitet 104,5 denarë për litër — 5,5 denarë më shtrenjtë — ndërsa benzinat lirohen 1,5 denarë: ajo 95-oktanëshe 99 denarë dhe 98-oktanëshe 101 denarë. Nafta ekstra e lehtë ulet 7 denarë dhe do të shitet 102,5 denarë, ndërsa mazuti shtrenjtohet.

Rritja e çmimit të dizelit u prit me reagim të ashpër nga opozita. SDSM e quajti goditje të re për buxhetet familjare, bujqit, transportuesit dhe gjithë ekonominë, duke akuzuar kryeministrin Hristijan Mickoski se refuzoi masat e propozuara për mbrojtjen e qytetarëve.

Sipas SDSM-së, partia kishte propozuar në kohë masa konkrete: heqjen e akcizës, uljen e TVSH-së në 5 për qind dhe pagën minimale 600 euro. “Mickoski i refuzoi këto propozime, ndërsa pasojat e këtyre politikave i paguajnë qytetarët”, thuhet në reagim.

Në deklaratë, opozita akuzon Qeverinë se shpenzon për aktivitete që nuk janë prioritet për qytetarët: “Ka 5,5 milionë euro për DJ për një mbrëmje, por s’ka para për masa mbrojtëse për qytetarët. Ka 200 milionë euro për tenderë kriminalë, por s’ka për bujqit. Ka para për delegacionin 50-anëtarësh të Mickoskit dhe avionin, por s’ka për pagën minimale.”

Sipas SDSM-së, rritja e kostove të jetesës po rëndon gjithnjë e më shumë standardin e qytetarëve: shporta e konsumit ka arritur rreth 90.000 denarë, ndërsa një pjesë e madhe e pagave nuk mjafton për mbulimin e nevojave bazë mujore. Partia vlerëson gjithashtu se me çdo shtrenjtim të karburanteve rriten edhe të ardhurat e buxhetit nga taksat.

Burimi: Fokus