Emigrantët sollën rreth 1,1 miliardë euro në 2025-ën

Dërgesat në para nga emigrantët shqiptarë arritën në 1,12 miliardë euro gjatë vitit 2025, duke shënuar nivelin më të lartë të regjistruar deri më tani.

Sipas të dhënave zyrtare të Bankës së Shqipërisë, krahasuar me vitin 2024, kur këto dërgesa ishin 1,04 miliardë euro, rezulton një rritje prej 73,69 milionë eurosh, ose 7,1%.

Italia, Greqia, Gjermania dhe Britania mbeten kanalet kryesore të dërgimit të parave në vend, për shkak të numrit të lartë të emigrantëve që jetojnë e punojnë në këto shtete.

Diaspora shqiptare përbën një nga komunitetet më të rëndësishme jashtë territorit të Shqipërisë, në raport me madhësinë e popullsisë rezidente.

Në vitin 2025, sipas vlerësimeve të tërthorta, numri i diasporës së re llogaritet të jetë rreth 2,25 milionë shtetas jashtë vendit ose rreth 49% e shtetasve shqiptarë gjithsej.

/a.f/r.e/