Emiratet e Bashkuara Arabe paraqesën kërkesë zyrtare për hapjen e ambasadës në Izrael

Ministri izraelit i Punëve të Jashtme, Gabi Ashkenazi, priti në takim një delegacion të Emirateve të Bashkuara Arabe, i cili sot mbërriti në Tel Aviv në vizitën e parë të nivelit të lartë nga shteti i Gjirit në Izrael.

Omar Saif Ghobash, këshilltar i ministrit të jashtëm të Emirateve të Bashkuara Arabe, paraqiti një letër nga kryediplomati Abdullah bin Zayed Al-Nahyan për kryediplomatin izraelit për hapjen e një ambasade në Izrael.

Në letrën e tij, Al-Nahyan falënderoi homologun e tij izraelit për mbështetjen në zhvillimin e marrëdhënieve midis dy vendeve dhe shprehu shpresë se edhe Izraeli së shpejti do të hapë ambasadën në Abu Dhabi.

Më 15 shtator, pas nënshkrimit të marrëveshjeve të diskutueshme në Shtëpinë e Bardhë, Emiratet e Bashkuara Arabe dhe Bahreini ranë dakord për krijimin e marrëdhënieve të plota diplomatike, kulturore dhe tregtare me Izraelin.

Marrëveshjet janë kundërshtuar gjerësisht nga palestinezët, të cilët thonë se ato injorojnë të drejtat e tyre dhe nuk i shërbejnë çështjes palestineze.