Euro në rënie rekord, PD kërkon masa nga qeveria dhe Banka e Shqipërisë

Në kushtet kur euro po shënon rekorde historike negative, opozita kërkon ndërhyrje në tregun e këmbimit valutor.

Në Komisionin e Ekonomisë, deputetët e PD kërkuan nga qeveria dhe Banka e Shqipërisë që të adresojnë këtë situatë, qoftë edhe me masa të përkohshme, dhe të mos mjaftohen me faktin që regjimi i kursit të këmbimit në vend është i lirë.

“Kemi të bëjmë me një situatë të paprecedentë, është e pakonceptueshme që BSH të ndërhyjë në tregun valutor me një ndërhyrje masive, më shumë se 1 mld euro, ku vlerësohet se 800-900 milionë euro i takojnë ndërhyrjes për të mbajtur të frenuar nënçmimin e euros, këtu kemi dalë nga funksioni ligjor i BSH, që të mbajë kursin e këmbimit në nivele të caktuara, por që të mbajë nën kontroll çmimet”, tha Enno Bozdo, deputet i PD

“A mundet BSH brenda një muaji të bëjë një studim dhe të vijë edhe me një propozim konkret? Ka nevojë për ndërhyrje në këtë moment. Një ndihmë e duan disa sektorë. Nga 140 në 94 është një rënie e tmerrshme e euros. Banka ka ndërhyrë, por që të mos ndodhemi përballë surprizave, le të bëjmë një politikë të përkohshme, nuk mund të heshtim përballë kësaj krize që ka sektori i prodhimit, jo vetëm manifaktura, por edhe bujqësia”, shtoi Igli Cara, deputet i PD.

Deputetët e djathtë i bënë thirrje qeverisë që të shohë me vëmendje të veçantë sektorët më të prekur nga rënia e euros, manifakturën dhe bujqësinë, duke hartuar politika fiskale në mbështetje të tyre për të përballuar situatën.

Nga ana e socialistëve, kryetarja e komisionit, Milva Ekonomi kërkoi një takim me ministrin e Financave për të trajtuar këtë çështje.