Filmi “Guximtarët” do të restaurohet falë nismës “Adopto një Film për Restaurim”

Një tjetër film i rëndësishëm i kinematografisë shqiptare do t’i nënshtrohet procesit të restaurimit.

Arkivi Qendror Shtetëror i Filmit ka bërë të ditur se, falë nismës “Adopto një Film për Restaurim”, është siguruar financimi për restaurimin e filmit artistik “Guximtarët”.

Donatori që ka bërë të mundur restaurimin ka zgjedhur të mbetet anonim, ndërsa drejtori i AQSHF-së, Eljan Tanini i ka shprehur mirënjohjen për kontributin e dhënë në ruajtjen e trashëgimisë sonë kinematografike.

Pas përfundimit të procesit të restaurimit, filmi do të shfaqet premierë në Kinema “Drita”, në mjediset e Arkivit, duke i rikthyer publikut një prej veprave të njohura të kinematografisë shqiptare.

Arkivi Qendror Shtetëror i Filmit bën me dije se nisma “Adopto një Film për Restaurim” mbetet e hapur për të gjithë ata që dëshirojnë të kontribuojnë në restaurimin e filmave të tjerë të fondit kombëtar.

“Guximtarët” është prodhim i Kinostudios “Shqipëria e Re”, realizuar në vitin 1970, me skenar të Flamur Topit dhe regji të Gëzim Erebarës. Filmi u xhirua nga operatori Saim Kokona, ndërkohë që ndër emrat e krijuesve renditen edhe piktori Bujar Zajmi dhe kompozitori Robert Radoja. Në role interpretojnë, mes të tjerëve, Artan Santo, Mevlan Shanaj, Edmond Gëzdari, Agim Mujo, Zana Turku, Tinka Kurti, Sandër Prosi dhe një kastë e gjerë aktorësh të njohur të kinemasë shqiptare.