FOKUS – Gjermania do të dërgojë me detyrim ushtarë në Lituani për të plotësuar brigadën

BERLIN, 14 shtator /ATSH-DPA/- Gjermania planifikon të urdhërojë dërgimin e detyrueshëm të disa qindra ushtarakëve në Lituani, për të plotësuar vendet vakante në brigadën gjermane të vendosur atje, njoftoi sot Ministria gjermane e Mbrojtjes.

Rreth 80% e vendeve në brigadë janë aktualisht të plotësuara nga ushtarakë, që janë regjistruar vullnetarisht.

Megjithatë, ka mungesa veçanërisht në personelin e logjistikës dhe specialistët e teknologjisë së informacionit.

Gjermania ka marrë përsipër të vendosë në mënyrë të përhershme në Lituani një brigadë të gatshme për luftim dhe që mund të veprojë në mënyrë të pavarur, në kuadër të forcimit të mbrojtjes së NATO-s pas pushtimit rus të Ukrainës.

Brigada do të ketë rreth 4 800 ushtarë dhe 200 punonjës civilë dhe pritet të jetë plotësisht funksionale deri në vitin e ardhshëm.

Për të, po ndërtohen baza të përhershme pranë Vilniusit dhe Ruklës.

Ministria theksoi se parimi i vullnetarizmit mbetet në fuqi, ndërsa për vendet ku ka mungesa do të shqyrtohen edhe dërgime më të shkurtra dhe rotacioni i personelit.

Që nga fundi i prillit, më shumë se 2 500 ushtarë gjermanë kanë dalë vullnetarë për t’u bashkuar me brigadën.

Lituania kufizohet me Rusinë dhe Bjellorusinë, ndaj vendi e konsideron veten veçanërisht të ekspozuar ndaj kërcënimeve të sigurisë, që nga pushtimi rus i Ukrainës. /