Forcat qeveritare të Jemenit: 1.879 operacione kundër Huthi-t në fushatën “Agimi i Jemenit”

Forcat qeveritare të Jemenit njoftuan të hënën në mbrëmje se kanë kryer 1.879 operacione ushtarake kundër Huthi-t në kuadër të fushatës “Agimi i Jemenit”, e cila synon rimarrjen e territoreve të mbajtura nga grupi i mbështetur prej Iranit, siç njofton Al Jazeera në përditësimet e saj live për luftën.

Sipas zëdhënësit të forcave qeveritare, operacionet janë kryer me avionë, artileri dhe raketa. Ai tha se gjatë fushatës janë shkatërruar 380 mjete ushtarake të Huthi-t dhe janë penguar përpjekjet e grupit për të sjellë përforcime dhe për t’u riorganizuar në frontet e luftimeve.

Fushata “Agimi i Jemenit” u shpall në fillim të tetorit nga kreu i Këshillit Presidencial të Jemenit, Rashad al-Alimi, me qëllimin e deklaruar çlirimin e kryeqytetit Sanaa dhe të territoreve të tjera nga kontrolli i Huthi-t. Që atëherë, luftimet janë intensifikuar në disa provinca, përfshirë Taizin dhe zonat përreth Ngushticës Bab al-Mandeb.

Përshkallëzimi në Jemen po zhvillohet paralelisht me sulmet e Huthi-t ndaj aeroporteve dhe objekteve energjetike në Arabinë Saudite fqinje, të cilat Riadi i është përgjigjur me sulme ajrore. Përplasja mes dy palëve është bërë fronti më aktiv i luftës më të gjerë që nisi në shkurt me sulmet amerikane dhe izraelite ndaj Iranit.