Franca forcon kufirin me Spanjën pas mbërritjeve masive të emigrantëve në Ceuta

Franca ka vendosur të forcojë kontrollet kufitare me Spanjën pas rritjes së madhe të mbërritjeve të migrantëve në enklavën spanjolle të Ceutës, në Afrikën e Veriut.

Ministri i Brendshëm francez, Laurent Nunez, bëri të ditur të premten se ka urdhëruar përforcimin e menjëhershëm të kontrolleve në kufirin spanjoll, pas situatës së krijuar në Ceuta.

“Në përgjigje të situatës së vërejtur në enklavën e Ceutës, dhashë udhëzime që kontrollet në kufirin spanjoll të përforcohen pa vonesë”, shkroi Nunez në platformën X. Ai njoftoi gjithashtu aktivizimin e një force të ndërhyrjes së shpejtë kufitare për kontrolle më të thelluara.

Edhe Italia ka reaguar ndaj krizës, me kryeministren Giorgia Meloni që deklaroi se Roma është e gatshme të marrë masa për mbrojtjen e kufijve të saj, përfshirë mundësinë e pezullimit të marrëveshjes Shengen me Spanjën. Ministri i Jashtëm italian Antonio Tajani bëri thirrje gjithashtu për masa të ngjashme, duke nxitur reagimin e Madridit.

Ministri i Jashtëm spanjoll, Jose Manuel Albares, kritikoi deklaratat e Tajanit dhe bëri të ditur se ambasadori italian ishte thirrur për sqarime.

Situata vjen pas një rritjeje të fortë të hyrjeve të parregullta nga Maroku drejt Ceutës. Sipas vlerësimeve fillestare të forcave të sigurisë dhe raportimeve të medias spanjolle, më shumë se 40 mijë migrantë kanë hyrë në enklavë ditët e fundit, shumica prej tyre gjatë së enjtes.

Të paktën 19 persona kanë humbur jetën në përpjekjet për të kaluar kufirin, ndërsa qindra migrantë që kishin hyrë në mënyrë të parregullt raportohet se kanë nisur të kthehen në Marok përmes pikës së kalimit nga ku kishin hyrë.

Kryeministri spanjoll Pedro Sánchez deklaroi se qeveria e tij po mobilizon të gjitha burimet në dispozicion për të përballuar situatën në Ceuta.