Franca kërkon një takim urgjent të Këshillit të Sigurimit të OKB-së për Libanin

Franca ka kërkuar një takim urgjent të Këshillit të Sigurimit të Kombeve të Bashkuara, pasi forcat izraelite zgjeruan operacionet e tyre tokësore dhe pushtuan Kështjellën mesjetare Beaufort në Libanin jugor.

“Kam kërkuar një takim urgjent të Këshillit të Sigurimit të Kombeve të Bashkuara sepse, ndërsa ne e njohim të drejtën e Izraelit, si të të gjitha vendeve, për vetëmbrojtje,… asgjë nuk mund të justifikojë vazhdimin e operacioneve ushtarake izraelite në Liban dhe pushtimin gjithnjë e më të thellë të territorit libanez”, tha ministri francez Jean-Noel Barrot.

Më herët ministri izraelit i Mbrojtjes, Israel Katz tha se trupat do të mbeten të stacionuara në Kështjellën Beaufort.

“Ushtarët tanë heroikë e kanë pushtuar përsëri Beaufortin dhe do të qëndrojnë atje si pjesë e zonës së sigurisë në Liban”, tha ai.

Dekada pas tërheqjes izraelite nga Libani, flamuri izraelit po valëvitet përsëri mbi majat që mbikëqyrin komunitetet e Galilesë, tha Katz në një ceremoni përkujtimore për ushtarët e rënë të luftës së vitit 1982.