Ftesa e Brahos për gazetarët, Ferhati zbulon detaje për takimin e nesërm në SPAK

Gazetari i Euronews Albania, Eni Ferhati këtë të mërkurë në emisionin “Now” me Erla Mëhillin ka zbuluar detaje lidhur me takimin që pritet të zhvillohet të enjten me kreun e SPAK, Klodian Braho. Ferhati u shpreh se ky takim vjen pas disa muajsh nga zgjedhja e tij në dhjetor si kreu i SPAK.

“Për herë të parë pas kaq muajsh zoti Braho na ka ftuar nesër në orën 12:00, por jo takim informal të lutem, një takim informues. Është takim informues i gazetarëve që mbulojnë institucionin, se ndoshta ky “informal” tingëllon pak jo korrekt. Është takim informues.

Çështja është kur ti je në një takim që bën edhe një pyetje për interesin publik për një lajm të caktuar, për një çështje që ti po ndjek, për një kuriozitet që ke e të tjerë me radhë, duhet të ndahet apo jo me publikun. Si rregull, nëse do zbatojmë manualin, duhet të merret dhe pëlqimi i personit të cilin pyet.

Nuk është se është zbatuar shumë. Jo, do ta mendoj se një pyetje të bësh, dy. Do ta mendoj, kuriozitetin më të madh, dy fishekë që do kem do t’i mendoj mirë. Besoj që nesër ndoshta mund të prodhojmë edhe lajm, por është takimi i pare.

Patjetër edhe SPAK-u besoj që tek media ka gjetur një aleat shumë të mirë për të përcjellë atë mesazhin, edhe më të mirin patjetër, pse jo. Dhe kështu duhet të jetë në fund të ditës.

SPAK është një institucion i hapur në kuptimin edhe të paraqitjes, sa i lejohet kuptohet, se ti nuk mund të marrësh informacion për çfarëdolloj gjëje, por ne e kemi gjetur zgjidhjen. Është një institucion i cili të jep edhe nëpërmjet njoftimeve publike që kryesisht i adresohen mediave dhe gazetarëve, njoftimet publike të SPAK-ut mund të shikosh një përshkrim të cilin mund ta kuptojë dhe një qytetar i thjeshtë”, tha ai.