Gashi mbron qëndrimin për vendimin e Hagës: “Ishte qëndrim personal — edhe si kryetar i Kuvendit kam të drejtë të kem opinionin tim”

Kryetari i Kuvendit të Maqedonisë së Veriut, Afrim Gashi, mbrojti sot qëndrimin e tij për vendimin e Dhomave të Specializuara të Kosovës në Hagë ndaj katër krerëve të Ushtrisë Çlirimtare të Kosovës — Hashim Thaçit, Kadri Veselit, Jakup Krasniqit dhe Rexhep Selimit, të cilët u shpallën fajtorë në shkallë të parë për krime lufte.

“Ishte qëndrim personal — edhe si kryetar i Kuvendit kam të drejtë të kem opinionin tim”, u shpreh Gashi, duke shtuar se, edhe pse është njeriu i parë i Kuvendit, ai si qytetar gëzon të drejtën e privatësisë dhe të një qëndrimi personal për çështje të ndjeshme.

Deklarata e tij vjen pasi, më 17 shtator, menjëherë pas shpalljes së vendimit, Gashi kishte reaguar në Facebook, duke shkruar se “asnjë vendim nuk mund ta mohojë faktin se Hashim Thaçi, Jakup Krasniqi, Kadri Veseli dhe Rexhep Selimi janë pjesë e kapitullit të lavdishëm të historisë së Kosovës… për popullin shqiptar, ata janë dhe mbeten çlirimtarë të Kosovës… vendimi i sotëm është në shkallë të parë, sepse beteja për drejtësi vazhdon”.

Reagimi provokoi kritika të ashpra nga opozita. LSDM e quajti reagimin e Gashit “tërësisht të papërshtatshëm”, duke theksuar se ai ushtron një funksion shtetëror dhe është përfaqësues i një shteti që aspiron anëtarësimin në Bashkimin Europian. Sipas opozitës, nuk mund të ketë standarde të dyfishta: vendimet e gjykatave ndërkombëtare duhen respektuar, ndërkohë që gjykata gjykon individë, e jo popullin shqiptar.

Burimi: Независен