GJERMANI – AfD-ja në 43% përpara zgjedhjeve kyçe parlamentare në Sanksoni-Anhalt

MAGDEBURG, 12 gusht /ATSH-DPA/ – Partia e ekstremit të djathtë Alternativa për Gjermaninë (AfD) ka arritur në 43% në sondazhe, më pak se katër javë para zgjedhjeve parlamentare rajonale në landin lindor të Saksonisë-Anhalt, sipas një sondazhi të publikuar sot.

Sondazhi, i kryer nga instituti kërkimor “pollytix” me qendër në Berlin dhe porositur nga organizata e fushatave “Campact”, e rendit Bashkimin Kristian Demokrat (CDU) të kancelarit Friedrich Merz në vendin e dytë me 23%.

Partia ”E Majta” (”Die Linke”) renditet e treta me 13%, e ndjekur nga Socialdemokratët (SPD) me 7% dhe Të Gjelbrit me 5%, që është edhe pragu minimal për përfaqësim në parlament.

Aleanca populiste e Sahra Wagenknecht (BSW) dhe Partia e Demokratëve të Lirë (FDP) nuk arrijnë pragun prej 5%, duke marrë përkatësisht 4% dhe 2%.

Rezultatet tregojnë se AfD-ja nuk do të mund të qeveriste e vetme në Saksoninë-Anhalt, pasi edhe me 43% të votave nuk do të kishte shumicën e nevojshme në parlament.

Kjo do të thotë se partia do të duhej të gjente një partner koalicioni për të formuar qeverinë, nëse rezultati i sondazhit do të përsëritej në zgjedhjet e ardhshme. /Ad.Ab./ a.jor.