GJKKO rrëzon kërkesën e Fatime Kryemadhit për t’u tërhequr nga gjykimi i shkurtuar, shtyhet seanca

Gjykata e Posaçme Kundër Korrupsionit dhe Krimit të Organizuar (GJKKO) ka rrëzuar kërkesën e Fatime Kryemadhit për t’u tërhequr nga zhvillimi i procesit me gjykim të shkurtuar.

Gjatë seancës, trupa gjykuese vlerësoi se avokatët e Fatime Kryemadhit e kanë paraqitur kërkesën për gjykim të shkurtuar si në fazën e seancës paraprake, ashtu edhe gjatë shqyrtimit në themel të çështjes. Në këto kushte, gjykata vendosi të mos e pranojë kërkesën dhe të vijojë me fazën procedurale të paraqitjes së konkluzioneve përfundimtare nga organi i akuzës.

Nga ana e tij, prokurori i SPAK-ut, Arben Kraja, kërkoi kohë shtesë për përgatitjen dhe paraqitjen e konkluzioneve përfundimtare.

Në përfundim, gjykata vendosi shtyrjen e seancës, duke caktuar datën 30 qershor, në orën 09:00, për vijimin e procesit gjyqësor.